Lindsay Lohan ត្រូវ​ពស់​ចឹក​ពេល​ទៅ​ដើរលេង​នៅ​ប្រទេស​ថៃ

តារា​សម្ដែង​ Lindsay Lohan បាន​ត្រូវ​ពស់​ចឹក​ពេល​ទៅ​ដើរ​កម្សាន្ត​នៅ​ ភូកេត​ ប្រទេស​ថៃ​កាល​ពី​ថ្ងៃ​ពុធ​ ដោយ​បាន​បង្ហាញ​តាម​រយៈ​ Instagram Story របស់​នាង។
តួ​រឿង "Mean Girls” រូប​នេះ​បាន​បង្ហាញ​វីដេអូ​មួយ​ដែល​ បង្ហាញ​ពី​ស្នាម​ចង្កូម​របស់​សត្វ​ពស់​ ចឹក​កំភួន​ជើង​ខ្លួន​ មើល​ទៅ​ពិត​ជា​គួរ​ឲ្យ​រអា​។ នាង​បាន​និយាយ​នៅ​ក្នុង​វីដេអូ​នេះ​ថា៖​ "ខ្ញុំ​ពិត​ជា​ស្រលាញ់​ទី​នេះ​ខ្លាំង​ណាស់ ដោយ​សារ​តែ​វា​ស្រស់​ស្អាត​... លើក​លែង​តែ​ស្នាម​ពស់​ចឹក​នេះ​តែ​ប៉ុណ្ណោះ"។

នាង​បន្ត​ទៀត​ថា​៖​​​ "សួស្តី! ពេលនេះ​ខ្ញុំ​នៅ​ ភូកេត ប្រទេស​ថៃ​នៅ​​ឡើយ​ ទីនេះ​គឺ​ពិត​ជា​ស្រស់​ស្អាត​ណាស់ ហើយ​ខ្ញុំ​ក៏​ត្រូវ​បាន​ពស់​ចឹក​ផង​ដែរ កាល​ពី​ថ្ងៃ​មុន។ ចំណុច​វិជ្ជមាន​នោះ​គឺ ខ្ញុំ​មិន​អី​ទេ។ សួស្តី​ឆ្នាំ​ថ្មី​ ហើយ​សូម​​ព្រះ​ប្រទាន​ពរ​"។

Lindsay បាន​ចំណាយ​ពេល​វេលា​ជាមួយ​គ្រួសារ​ខ្លួន​នៅ​ប្រទេស​ថៃ​នេះ ដើម្បី​ជប់​លៀង​អបអរ​បុណ្យ​គ្រីស្តម៉ាស​និង​ចូល​ឆ្នាំ​ថ្មី​៕