ដំបៅមិនឈឺ កុំយកឈើរុក បើនៅលីវហើយគ្មានបញ្ហា ខំប្រញាប់រកគូធ្វើអី?
ពាក្យចាស់តែងពោលថា៖ "ដំបៅមិនឈឺ កុំយកឈើរុក"។ រឿងមនោសញ្ចេតនាក៏ដូចគ្នា ប្រសិនបើកំពុងនៅម្នាក់ឯង ហើយគ្មានបញ្ហាអ្វីកើតឡើង កុំបង្ខំយកមនុស្សម្នាក់មកធ្វើបាបខ្លួនអី។
មិត្តខ្ញុំតែងសួរថាហេតុអីខ្ញុំមិនរកម្នាក់ស្រលាញ់ទៅដើម្បីឲ្យរវល់ខ្លះ? ហេតុអីមិនស្រលាញ់អ្នកណាម្នាក់ទៅឲ្យស្បើយភាពឯកា ហើយមានគូនឹងគេ? តែខ្ញុំគិតថា សំនួរទាំងនេះគឺពិបាកពេកហើយ ព្រោះស្នេហាមិនមែនជាអ្វីដែលចង់បានគឺបាននោះទេ។ ពេលខ្លះយើងប្រញាប់ពេក នាំតែឱបទុក្ខខ្លួនឯងតែប៉ុណ្ណោះ។
ប្រសិនបើអារម្មណ៍ខាងក្នុងចិត្តអ្នកមិនទាន់គិតថាវាគឺជាស្នេហា គ្រាន់តែស្រដៀង ឬអ្នកបង្ខំគេឲ្យមានអារម្មណ៍ដូចនេះនោះ សូមកុំទាន់ប្រញាប់អី។ ព្រោះមិនមែនអ្នកណាក៏សំណាងទទួលបានស្នេហាពិតនោះឡើយ។ មានអ្នកខ្លះ មានស្នេហាមុនអ្នក ក៏មិនតិចអ្នកដែរដែលមានស្នេហាក្រោយអ្នក នៅតែគ្មានបញ្ហា ពិភពលោកនៅតែវិល ជីវិតនៅតែបន្ត។
ខ្ញុំមិនមែនជាមនុស្សគ្មានអារម្មណ៍នឹងស្នេហានោះទេ គ្រាន់តែខ្ញុំប្រុងប្រយ័ត្ននឹងរឿងបែបនេះតែប៉ុណ្ណោះ។ ខ្ញុំមិនចូលចិត្តមនោសញ្ចេតនាបែបប្រញាប់ប្រញាល់ ប្រថុចញ៉ុច មានឲ្យតែមាន ដើម្បីអួតគេ ឬបង្គ្រប់កិច្ចជាកូនល្អនោះទេ។
និយាយរួមទៅ កំឡុងពេលនៅលីវ បើទោះជាមិនសូវសប្បាយចិត្តមែនពិត ក៏វាមិនអាក្រក់ណាស់ណាដែរ ព្រោះយ៉ាងហោចណាស់ក៏វាបង្រៀនឲ្យយើងចេះរឹងមាំដែរ។ មនុស្សអស់ធំអស់ហើយ ទោះពេលខ្លះឯកា ក៏ត្រូវតែជម្នះឲ្យបាន។
ស្រលាញ់គ្នាដើម្បីទទួលបានសុភមង្គលអ្នកណាមិនចង់ តែបើស្រលាញ់ដើម្បីតែឈឺចាប់ សុខចិត្តនៅអេសិនក៏បាន។ មុនពេលរកបានមនុស្សដែលយើងគិតថា ត្រឹមត្រូវសម្រាប់ជីវិតយើង នៅលីវសិនទៅ ព្រោះនៅលីវមួយជីវិតទៅហើយ គ្មានបញ្ហាអីផង៕
No comments