នៅ Qingshan ខេត្ត Yunnan ប្រទេសចិន ក្មេងប្រុសបងប្អូនគ្នាចំនួនបួននាក់ ត្រូវបានប្រទះឃើញស្លាប់ក្នុងផ្ទះរបស់ខ្លួន ក្រោយពួកគេបានបង្កាត់ធ្យូងដើម្បីបានភ្លើងមកឆ្អើរកុំឲ្យរងា។ ការស្លាប់នេះ ត្រូវបានគេសង្ស័យថា បណ្ដាលមកពីការពុលផ្សែងភ្លើងធ្យូងនោះ។
ហេតុការណ៍នេះ តាមការពិតកើតតាំងតែពីថ្ងៃអាទិត្យ តែទើបយកមកចុះផ្សាយក្នុងសារព័ត៌មានល្បី South China Morning Post នាថ្ងៃនេះ។
កាលពីថ្ងៃអាទិត្យ នៅពេលឪពុកម្ដាយខ្លួនចាកចេញទៅទីក្រុង Kunming ក្មេងទាំង ៤នាក់បានបង្កាត់ធ្យូងដើម្បីយកភ្លើងមកឆ្អើរកុំឲ្យរងា។ ទោះជាយ៉ាងណា នៅពេលភ្លើងធ្យូងឆេះហើយនោះ ពួកគេមិនបានបើកបង្អួច ឬទ្វារ នោះឡើយ ដែលនេះធ្វើឲ្យមានផ្សែងធ្យូងពុលហ៊ុយក្នុងផ្ទះ។
នៅព្រឹកថ្ងៃចន្ទ ដោយមិនឃើញក្មេងទាំងនោះ ទៅរៀន សាលាបានទាក់ទងទៅឪពុកម្ដាយពួកគេ ដើម្បីសួរនាំពីអវត្តមាននេះ។ ក្រោយពីទទួលដំណឹងនេះ ឪពុកម្ដាយក្មេងទាំងបួន បានទាក់ទងទៅអ្នកជិតខាងខ្លួន ដើម្បីពឹងឲ្យទៅជួយពិនិត្យមើលស្ថានភាពនៅផ្ទះរបស់ខ្លួន។ ពេលអ្នកជិតខាងទៅដល់ ទើបប្រទះឃើញថាក្មេងទាំងបួនបានស្លាប់ទៅហើយ។ ការស្លាប់នេះ ត្រូវបានគេសង្ស័យថា អាចបណ្ដាលមកពីកុមារាទាំងបួនពុលផ្សែងភ្លើងធ្យូងដែលខ្លួនបានដុតកាលពីថ្ងៃអាទិត្យ។
សូមបញ្ជាក់ផងដែរថា អ្នកភូមិជាច្រើនក្នុងតំបន់ Qingshan មានជីវភាពក្រីក្រ មិនមានលទ្ធភាពក្នុងការទិញម៉ាស៊ីនកម្ដៅទំនើបនោះទេ។ នៅខែរងា ពួកគេតែងដុតអុស ឬធ្យូង ដើម្បីបានកម្ដៅ។ ទោះជាយ៉ាងណា ការដុតអុស ឬធ្យូងនេះ បើដុតមិនបានត្រឹមត្រូវ អាចបង្កជាផ្សែងពុលច្រើនលើសលប់ ដែលបណ្ដាលឲ្យប៉ះពាល់ដល់សុខភាព ឬអាចឈានដល់ស្លាប់បើសិនជាស្រូបផ្សែងនេះក្នុងបរិមាណច្រើនពេក ដូចករណីខាងលើអីចឹង៕
Post Comment
No comments